يا حسرة عليكي يا مصر

يا حسرة عليكي يا مصر
مصر أم الدنيا بيجري فيها ايه , والله انا فعلا بقيت مش عارف , الظاهر انها خلاص ..... بس خلاص ايه وايه هو اللي خلاص .... خلاص اخلاق الناس, خلاص المبادئ, خلاص الأحلام , ولا خلاص الايمان والأمان , ولا ايه ولا ايه.

الناس في مصر حصلهم حاجة غريبة جدا ,كتير كنت أقعد أفكر هو ايه اللي بيجري هو ليه الناس بقت كدة , ليه ما فيش ولد ولا شاب بيقوم لراجل عجوز في المترو ولا ليه الست الحامل تفضل تبص علي الناس جايز يكون فيه واحد يقدَر انها تعبانة وممكن حد يقوم لها , كل واحد في عقله بيقول لنفسه " هو اللي جنبي خلاص هيقوم .. استني شوية طيب أعمل نفسي مش واخد بالي ... بعدين هيه ليه ماركبتش عربية السيدات هو احنا ناقصين مش كفاية الزحمة دي " كل واحد لقي مكان قعد فيه وحلف ما يقوم منه ويمكن بيزعل لما المحطة بتاعته بتيجي لأنه هايسيب كرسيه ...... أه الظاهر حكاية الكرسي دي مهمة قوي في مصر ... ويمكن كل واحد عايز يورث الكرسي لأبنه!!!!!!.

قصة غريبة جدا , بس لو حكيتها لأي حد يقولك "يا عم عادي دي بتحصل كل يوم وما خفي أعظم" وكأن الغريب أصبح عادي والمرفوض أصبح هو الواقع . القصة بإختصار واحدة راحت اشتكت حته أمين شرطة – أسف بس يعني لاراح ولا جه- لأنه بيتحرش بيها هو وأخوه الجزار واتحرشوا كمان بإختها المجوزة وضربوا جوزها , وأمين الشرطة ضربها بسيف – سنجة يعني- علي وجهها عدة مرات وسبب لها جروح وساحاجات عديدة ومعاها تقرير طبي , وكمان اختها ضربها الجزار بسيف تاني –سنجة تانية يعني متهيألي زمن السيوف خلص!!!!- ضربها علي صدرها وجرحها ومعاها تقرير طبي يثبت كلامها. وهي بتقدم البلاغ تخيلوا ايه اللي حصل ؟؟؟؟؟ 

لأ لا لا ...... كل اللي جي علي بالكم غلط, الأمين اللي المفروض يأخد منهم البلاغ راحوا لقيوه مجهز محضر وقالهم يوقعوا عليه "علشان تبقوا تزعلوا الباشا الأمين " وضربوهم هو وشوية عساكر 

(أصلها بقت صحيح "هي فوضي"). عادي صح.

هي دي مصر دلوقتي حاميها حراميها , طيب وهو يحميها ليه وهي مش ليه. مصر دي بقت بتاعه الباشا الفلاني والعلاني يعمل فيها ما بداه زي ما تكون عزبة باباه , يبيع الحديد بالسعر اللي يعجبه –واللي مش عاجبه يشرب من البحر واللي امه داعيه عليه يفكر يستورد حديد من غير أذنه ولا يبيعه بسعر أقل من اللي يقول عليه. أو الباشا التاني اللي بستورد القمح الفاسد المسرطن – حقه ما هو الشعب معدته بتهضم الزلط وهو كمان عايز يكسب له حبتين.

ولا الباشا الكبير اللي افتكر ان بابا جاب له لعبه سيزر – لعبة كومبيوتر للي ما يعرفهاش بتبني مدينه وتنميها! وتكبرها! علشان تبقي امبراطورية وتاخد بالك منها كويس من ضرايبها واقتصادها وعلمها وجيشها وغيره- بس الظاهر انه مايعرفش ان لو اللعبة قالت له جيم اوفر مش هايعيدها تاني ويصلح أخطاؤه لأن دي مصر مش اللعبة.

يا حسرة عليكي يا مصر , يا حسرة علي اخلاق الناس اللي بتخلي الواحد دلوقتي يقتل علشان طابور العيش , يا حسرة علي البلد اللي كان شعبها مضرب الأمثال في الشهامة والإستقامة , يا حسرة علي البلد اللي المحترم فيها مالوش أي قيمة, يا حسرة علي الشعب اللي طرد الأنجليز والفرنساويين ,والاسرائليين والتتار والصليبيين, وقبل كل دول الهكسوس, دلوقتي مش قادر علي شوية بلطجية.
يا حسرة عليكي يا مصر يا بلد الأمن والأمان, يابلد سعد زغلول وأحمد عرابي يا بلد مصطفي النحاس ومصطفي كامل الباشوات اللي بحق , مش ملاحظين ان أحنا بقالنا 25 سنة البلد مافيهاش رجالة يبقي نقول يا حسرة علي الرجالة , بلد الرجالة ووقفة الرجالة لو كنا بس نعرف نقف وقفة رجالة ... الله يرحمك يا محمود يامليجي . 

يا حسرة عليكي يا مصر , ولادك مش قادرين يعيشوا فيكي , بيحاولوا يسيبوكي وعنيهم ملاينه دموع , بيحاولوا يهاجروا ويموتوا في البحر والصبح ناس تانية تحاول من تاني , ولما يبقوا برة يحسوا بجد انهم بيحبوا البلد دي بس مش هايقدروا يرجعوا ليها تاني. الواحد لما بيمشوا منها بيحس انه يقدر يتنفس أنه يقدر يحس وانه يقدر ينجح , أوعي تتصور مهما افتكرت انك نجحت فيها ان نجاحك ده هايفضل كتير إلا لو انت مع الباشا العلاني ولا الفلاني , وساعتها يبقي احنا نقولك – أهلا ياباشا.....
لو لم أكن مصريا ...........والله يرحم الباشا اللي مش مزيف مصطفي كامل

الإنتخابات الأمريكية

لقد كان من حسن حظي أن أحظي بهذه الفرصة الذهبية وأن أتواجد علي الأراضي الأمريكية في تزامن مدهش مع واحدة من أعظم المراحل في التاريخ الأمريكي كله , وهي تلك الإنتخابات التي أثبتت بحق أن الدولة الامريكية والشعب الامريكي يستحقان معا لقب أعظم امة وشعب علي وجه البرية .

لو أنك كنت هنا في تلك اللحظة التاريخية , وكنت مصري مثلي , لظننت أن فريق الأهلي العريق هزم خصمه اللدود (الزمالك) بما لا يقل عن دستة من الأهداف, ولكن تلك الفرحة العارمة التي قابل بها الناس هنا - علي إختلاف الوانهم - خبر فوز أوباما لم تكن بسبب إحدي مباريات الكرة أو غيرها ولكنها كانت بسبب أن ماأرادوه تحقق بالفعل.

كنت مثل غيري أتابع الإنتخابات علي الهواء مباشرة والنتائج تعرض أولاً بأول في كل ولاية تعرف ما لونها أزرق (أوباما) أم أحمر (ماكين) وكذلك علي الإنترنت, وما أن أُعلن عن فوز أوباما حتي انطلق الناس يجوبون الشوارع في فرحة لم أرها من قبل , فتراهم تارة يصرخون بنوع من الهستيريا تعبيرا عن الفرح (وهي طريقة غريبة للتعبير عن الفرحة ولكنها معتادة هنا) وتارة أخري يطلقون الأعيرة النارية وكأن أوباما هو واحد أسرة كل منهم. لقد ظل الناس يحتفلون في الشوارع حتي الثالثة صباحا (وأنا هنا أتحدث عن تكساس ).

لا أريد أن أتحدث عن مصر , ولكن لا أستطبع , فالشعب المصري عظيم بحق ومن حقه أن يفرح فرحة حقيقية بدلا من أفراحه الزائفة بمباريات الكرة والتي أنغمس فيها ربما لنسي همومه الكثيرة , (أنا لا أظن أن الشعب سيفرح إذا تولي ......... الحكم).

أما رد فعل المرشحين فلا تري فيه أي شخص يحاول أن ينال من الأخر أو ينقص من قدره وهذا بالطبع غريب علينا , فنحن تعودنا ان يباهي المنتصر بنصره وأن ينقص المهزوم من قدر المنتصر , أسألوا الله معي أن يرحم هذا الشعب.

قدم ماكين خطاب رائع من أريزونا عقب أعلان فوز مرشح الحزب الديمقراطي باراك أوباما, وعلي الرغم من أنه تجنب أن يدعو أوباما بالرئيس (وقد يكون علي حق حيث انه لن يكون الرئيس إلا في يناير) إلا أنه أصر علي أنه بالأمس كان يتنافس للحصول علي أكبر مقعد في الحكومة ليس لشيء إلا لخدمة هذا البلد العظيم , أما اليوم فقد عاد من جديد مواطن عادي ليخدم البلد بإخلاص أكبر لكي تكون أمريكا أعظم أمة في التاريخ وليتركها أعظم لأحفاده. وقد أصر أكثر من مرة علي أن البلد تتحرك من جديد وأنه لابد لها أن تنهض من كبوتها بعد مقتل مارتن لوثر كينج وان أوباما يعد أول رئيس من أصل أفريقي . ومن جديد يعود لكي يؤكد علي أنه يسعده أن يعاون السيناتور اوباما علي إدارة البلد لتخطي العقبات التي تواجهها الأن ويظل يحاول اسكات الناس الذين يرفضون أوباما وهو يقول لهم "من فضلكم" عدة مرات ورفض أن يسمع أو يقول كلمة سيئة عن غريمه (لاحظ أنه لم يتهمه بالتزوير أو السرقة أو النهب وخلافة).

وخلال الحديث الرائع الملئ بالحماس والتشجيع الغير عادي من الأمريكيين أكد عدة مرات علي ضرورة التفاني من أجل البلد نلاحظ كراهية العديد من الناس والحزن البادي في عيونهم لكون الرئيس القادم من أصل أفريقي فأمريكا لم تتخلص بعد نهائيا من التمييز العنصري ولكن يمكنك أن تقول أنه يتواري خجلا ليس إلا, ولكن الجميل هو الحب الغير عادي والإنتماء اللا تقليدي والذي أعتقد أنه يندر وجوده في أي بلد أخر (يمكننا تجاهل مصر من هذا تماما) وهو الأمر الذي نجح الأمريكيون في زرعه داخل نفوس الجميع من أصغر طفل إلي أكبر شخصيات البلد .

بالطبع لاأريد أن أقارن هنا بين الإنتخابات الأمريكية وبين الإنتخابات المصرية العظيمة والتي تثبت بحق أن مصر تعيش أزهي عصور الديموقراطية, فهنا للأسف لا تجد شروط الترشيح للرئاسة مجحفة, أي شخص يجد في نفسه القدرة يتقدم ويرشح نفسه, وأيضاً لا تجد تفاوت رهيب في التغطية الإعلامية لكل المرشحين (فبالطبع لابد أن ينحاز الإعلام ....!!!) كما أنك لا تري وعودا خيالية يعلم الناس كلهم من أصغرهم لأكبرهم أنها مستحيلة , كما لا أظن أنني سأري ماكين في الفترة القادمة بالسجن متهما بأي تهمة ملفقة , بالإضافة إلي أن الحزب الجمهوري سيظل مكانه ولن يتفكك بعوامل خارجية أو يحترق مقره مثلا.

فعاشت مصر .... وتحيا مصر ....

لو لم أكن مصرياً ......................... وعلي مصطفي كامل باشا رحمة الله.

الواحد بجد حيران

أنا مش عارف ليه لسه الواحد عينيه بتدمع لما يسمع الأغنية دي
يالا منه لله الموقع ده اللي قلب علينا المواجع من جديد, أنا أصلي كنت فاكر اني بكرها بجد لكن الظاهر ان الواحد بس مخنوق مش اكتر من كده ومنه لله اللي كان السبب.
وانا بتجول في مواقع الانترنت زي العادة سمعت في موقع أغنية يبقي انت أكيد أكيد في مصر ,ومن غير ما أشعر لقيت عينيا بتدمع وانا حزين علي البلد والله مصر كانت أجمل بلاد الدنيا ومازالت أجمل بلاد الدنيا
أنا بقول الكلام ده وانا هنا في أمريكا أرض الأحلام بعد ماكان كل حلمي أني أسيب مصر (حلم عادي زي 99% من شباب البلد ) وبعد ما جيت هنا وانا بيتهيأ لي أني بكره مصر اكتشفت أني والله بحبها , بس بحب نفسي وكرامتي أكتر بحب عزة نفسي أكتر, بحب مراتي وولادي وخايف علي مستقبلهم أكتر بكتير من حبي لمصر.

أزاي الواحد يحب البلد وهو فيها الصبح متهان, بعد الظهر مخنوق, والعصر في المواصلات مزنوق, وباليل بايت مذلول.

أنا دلوقت بس بدعي ربنا أني مرجعش ليها تاني (إلا لما تتعدل وترجع من تاني بلدنا) الأحسن لي ولولادي ان أحنا نبعد عنها ونفضل نحبها ,عن ما نفضل فيها ونكرهها