انا مش عارف هو الواحد المفروض يتكلم عن الحاجات دي والا دي بقت حاجة مفروغ منها، كنت باسمع ان زمان في عهد الملكية (والله مش عارف اترحم عليها والا لا ) كانوا بيقولوا ان شوارع مصر كانت أجمل من شوارع لندن وباريس ، لكن دلوقتي ..... مش لاقي كلام اقوله .
انا بس هاعمل مقارنة بسيطة بين شوارعنا وشوارع امريكا ومش في حتة كبيرة لا دي أوستن بتكساس يعني لا قولت نيويورك ولا واشنطن دي سي ولا كاليفورنيا لأن المقارنة هاتكون ظالمة جدا ، لا وكمان هقارن بشوارع القاهرة مش اي حتة تاني .
أول يوم نزلت فيه أوستن لفت انتباهي اتساع الشوارع فهي بجد شوارع عريضة والناس ليها مكان تمشي عليه وبتحترمه جدا مافيش حد بيعدي الشارع من أي حته والسلام لمجرد انها اقرب للحته اللي هو عايز يروحها ، كله بيحترم كله . لو انت بتعدي الشارع تلاقي اللي راكب عربية يقف ويستناك ويبتسم لك ويمكن كمان يصر انك انت اللي تعدي ، طبعا مش هايشتمك ولاها يسب ويلعن ولا حاجة من اللي متعودين عليها في مصر.
مكان المشاه نفسه جزء من الرصيف ومش علي الحافة لكن جوة شوية يعني حوالي 75 سم والجزء ده مزروع نجيلة خضراء جميلة ، يعني انت في أغلب الأحوال ماشي وعلي يمينك وشمالك خضرة مريحة للنفس جدا، أه نسيت أقول ان الشوارع كلها فيها شجركبير زي المعادي زمان.
الأحلي من كل ده عند نهاية الرصيف يعني عند تقاطع الشوارع الرصيف بينزل لغاية الارض ، لا مش اتوماتيك ده لسة في افلام الخيال العلمي بس ، المقصود ان الرصيف بيكون في مسنوي الشارع بدرجة ميل عند الاماكن المخصصة لعبور المشاة فقط ، وده طبعا جزء من احترامهم للمقعدين الذين يستخدمون الكرسي المتحرك فمن حقهم انهم يعيشوا زيك ويمشوا زيك . يعني طول ماانت ماشي لا بتطلع ولا بتنزل انت ماشي والطريق بيساعدك ؟؟؟!!
استني بقي خد دي ، أحلي واجمل وامتع حاجة هنا انك وانت ماشي تقابل واحدة زي القمر عيون خضر وشعر زي الدهب وبياض يشرح القلب بجد ولما تقابلك تبتسم ابتسامة ولا اروع ولا أحلي من كدة وهي بتصبح أو بتمسي عليكي ، يا عيني والله لو انت ايه ومهما كان حجم الهم اللي علي دماغك غصب عنك بتبسم ليها وتضحك وتنتعش مش بقوللك ، عندنا في مصر لو ضحكت في وش حد ممكن يضربك ولو واحدة تفكرك بتعاكسها مهما كان شكلها بالرغم من ان الرسول صلي الله عليه وسلم قاللنا تبسمك في وجه أخيك صدقة.
مصر بقي حدث ولا حرج , الشوارع مش نظيفة –انا نسيت اقول ان الشوارع بتنظف كل يومين وبيعدي ناس أغلبهم من امريكا الجنوبية بيقصوا النجيلة وبيشيلوا أوراق الاشجار علشان يبقي الشارع علي نظافته- اما مصر اكوام الزبالة بقت من العلامات التجارية للقاهرة ، ارصفة الشوارع عايزة بطل في القفز العالي علشان يطلع عليها ،الناس عليها غضب من ربنا ولو ابتسمت في وش أي شخص ممكن يقولك كلمة تزعلك .....، وأماكن المشاة البياعين وأصحاب المحلات واخدنها علشان دافعين للباشا بتاع المرور.
انا مش قادر أقول حاجة اكتر من كدة ، حرام كفاية ارحموا مصر وشوارع مصر والناس اللي في مصر .
وربنا يرحم الباشا مصطفي كامل لو لم اكن مصريا لكنت اسعد رجل في العالم.
